How to benefit from the LinkedIn application and get jobs

كثير منا فتح حساب بالموقع وتركه وباعتقاده إنه عمل اللي عليه، الموقع فيه وظائف بلا حصر وبمسميات لا تخطر على بالك وبرواتب مجزية بكل المناطق، سواء عن بعد أو بدوام جزئي. الأهم تعرف كيف توصل لها. ثريد مفصل عن أسرار اللنكد ان

أولا لازم نعرف إن موقع لنكدان وظيفته الرئيسية إنه يجمع الباحثين عن عمل بجهة التوظيف. ولازم نعرف إن جهة التوظيف محتاجه الموظف مثل ماهو محتاجها لدرجة إن بعض الشركات تخصص موظفين فقط لمتابعة هذا الموقع وصيد المبدعين Recruiting وش يستفيد الموقع؟ إعلانات واشتراكات بالنسخة المدفوعة.طبعاً ما راح أتكلم عن القسم المتعلق بجهات التوظيف فهذا مو موضوعنا. خلونا نركز بقسم الباحثين عن عمل وكيف ممكن تجد وظيفة أحلامك “أو كيف هي تجدك”. لا تقول مافيه وظائف، الموقع فيه وظائف لا تخطر على بال أحد. مثلا: “شركة تبحث عن شخص يفهم باللهجة المحلية ليساعدنا بنشر وفهم المحتوى”.أول خطوة تحمّل التطبيق وتنشىء حساب فيه. إذا كانت لغة الجوال عربي فالتطبيق سيكون عربي، وإذا كانت انجليزي فسيكون انجليزي وهكذا.ثاني خطوة راح تأخذ منك وقت. لازم تعبي كل الخانات المطلوبة بصدق واحترافيه: اسمك ودراستك ومهاراتك ولغاتك واسم مدرستك الابتدائية والمتوسطة والثانوي والجامعة ومتى تخرجت وكل شيء.. كل شيء حرفيا. كل ما عطيت الموقع معلومات أكثر راح تتعرف الخوارزميات عليك أكثر والموقع بيطلع وظائف تناسبك.ثالثا: لازم نتكلم شوي عن الصورة. الصورة مهمة جدا ولازم تكون رسمية او على الأقل تكون صورتك. إذا ماعندك صورة أو مو حاب تبرزها فاترك الخانة فاضية. انتبه تحط صور مشاهير أو صور ورد أو دلة قهوة وغيرها من الرمزيات فغالبا سيتم ابعادك من خوارزميات البحث لأنك شخصية غير جادة أو غير حقيقية.إذا أكملت كل البيانات المطلوبة فالموقع سيخبرك بأن ملفك مكتمل بنسبة ١٠٠٪ وجاهز للبحث عن عمل. طبعا تقدر تبحث عن وظائف قبل لا يكتمل ملفك “وهذا اللي حاصل للأسف من الكثيرين” لكن الموقع ممكن ما يساعدك. أيضاً فيه نسخة مدفوعة باشتراك شهري مليانة دورات ومميزات لكنها ليست ضرورية للتوظيف.من مميزات الموقع إنه يخبرك بمن اطّلع على ملفك سواء كأشخاص أو كجهات توظيف. أيضا أي ملف تدخله يظهر لصاحبه بأنك اطّلعت عليه. هذي ميزة وعيب بنفس الوقت فلازم تنتبه متى تستخدمها.بعد ما أكملت ملفك تبدأ تضيف كل الأشخاص اللي تعرفهم إلى شبكتك. سواء مدرس قديم، دكتور بالجامعة، زميل سابق، شخص التقيت به في مؤتمر. راح تتفاجئ كيف لنكدان يظهر لك الأشخاص اللي ممكن تكون تعرفهم بدون حتى لا تبحث عنهم. هذا كله إذا عطيته معلوماتك الصحيحة وتواصلت مع ناس تعرفهم فعلا.فيه خانه بالتطبيق بالزاوية اسمها الوظائف او Jobs. تدخل عليها وتلقى لنكدان محضر لك وظائف متاحة وتكون مناسبة لك. حالياً لنكدان عنده خدمة التقديم السريعة Easy Apply لبعض الوظائف. تضغط على الرابط ثم تكتب ايميلك وجوالك وأي معلومات يطلبونها وماعليك إلا تنتظر الرد.

بعض الوظائف من أول ما تنزل ممكن تقفل لأنهم وجدوا المطلوب وبعضها تجلس شهور مفتوحة… أنت وحظك ومن سبق لبق. مايحتاج أقولك إنك لازم تدخل الموقع باستمرار حتى تقتنص أي فرصة لأن أغلب جهات التوظيف تحتاج موظفين بشكل سريع.الموقع فيه مميزات لا تحصى وأنصح كل الباحثين عن عمل بتخصيص ساعة يوميا على الأقل يبحثون ويغوصون فيه ويقدمون على كل الوظائف المتاحة. أغلب المقابلات تتم عن بعد والرد بالقبول أو الرفض بيكون سريع بالعادة.أهم خطوة: لازم تقرأ الوصف الوظيفي قبل تقدم وحاول تبني السيرة الذاتية بناء على متطلبات شركة التوظيف. أحيانا سيرتك الذاتية تكون غنية بالإنجازات فلازم تفصلها حسب المطلوب.. يعني إذا الوظيفة تقنية لا تحط انجازاتك الرياضية والعكس صحيح. هنا مثال لوصف وظيفي لعمل عن بعد.

ملاحظة مهمة: إذا عندك لغة إنجليزية ممتازة وساكن في إحدى المدن الكبيرة أو عندك استعداد تسكن فيها فالوظائف بتجيك مثل المطر. لكن حتى اللي ما معاه لغة أو ساكن في مدينة نائية فيه له فرص خصوصاً بالتوظيف عن بعد والعمل من المنزل لكنها ماراح تكون بنفس الكمية.